මීදුම මැදින් බණ්ඩාරවෙල යමුද?

දෙසැම්බර් නිවාඩුවට කොහේ හරි යන්න ප්ලෑන් කරන අයට පොඩි ඔත්තුවක් දෙන්නයි මම අද සූදානම් වෙන්නෙ. වෙනසකටත් එක්ක යමු බණ්ඩාරවෙලට.

කොළඹ ඉඳන් බණ්ඩාරවෙල යන ඔබ මුලින්ම රත්නපුරට ආ යුතුයි. මේ සඳහා මුලින්ම A4 මාර්ගයෙන් හෝමාගම, අවිස්සාවේල්ල හරහා රත්නපුරට පැමිණිය හැකියි. එසේත් නැතිනම්, මුලින්ම පානදුරටත් එතැනින් A8 මාර්ගය ඔස්සේ හොරණ හරහා රත්නපුරටත් පැමිණිය හැකියි. රත්නපුර සිට A4 මාර්ගයෙන් පැල්මඩුල්ල, ඕපනායක හරහා බලංගොඩට පැමිණිය යුතුයි. එතැන් සිට බෙලිහුල්ඔය හරහා බෙරගලට පැමිණෙන ඔබ අනතුරුව A16 මාර්ගයෙන් හපුතලේ හරහා බණ්ඩාරවෙලට ගමන් කරනවා.
දුර ගැන අදහසක් දෙනවා නම්, කොළඹ සිට රත්නපුරට දල වශයෙන් කි. මී. 100ක් පමණ තියෙනවා.  එතැන් සිට බලංගොඩට කි. මී. 45 ක් පමණ තියෙනවා. බලංගොඩ සිට බෙරගලට තවත් කි. මී 40ක් පමණත්, එතැන් සිට බණ්ඩාරවෙලට කි. මී. 18ක් පමණත් තියෙනවා. මුලු දුර දලවශයෙන් කි. මී. 200ක් පමණ වෙනවා.

බණ්ඩාරවෙල අවට නවාතැන්පොලවල් නම් යහමින් තියෙනවා. නවාතැන්පොලක් සොයාගැනීමට ඔබ එතරම් වද වියයුතු නැහැ. හැබැයි උණුවතුර පහසුකම තිබේද කියල හොයල බලන්න.

දින කීපයක නිවාඩුවක් ගතකිරීමට බණ්ඩාරවෙල පැමිණි ඔබට නැරඹිය හැකි තැන් මොනවාද?

මුතියංගනය රජමහා විහාරය 

බණ්ඩාරවෙල සිට බදුල්ල නගරයට ඇත්තේ කි. මී. 30කට මඳක් වැඩි දුරක්. ඒ සඳහා ඔබට ගතවෙන්නේ පැයකට අඩු කාලයක්. මුතියංගන රජමහා විහාරය පිහිටල තියෙන්නෙ හරියටම බදුල්ල නගර මධ්‍යයේ. සොලොස්මස්ථාන වලට අයත් මුතියංගනය දෙවනපෑතිස් රජු විසින් කරවූ බවත් පසුව බොහෝ රජවරුන් විසින් ප්‍රතිසංස්කරණය කරවූ බවත් සඳහන් වෙනවා.
මෙහි බුදුරජාණන්වහන්සේ විසින් තවත් පන්සීයක් මහරහතුන්වහන්සේලා සමඟ නිරෝධ සමාපත්ති ගතව වැඩසිටිබව කියැවෙනවා.


දුන්හිඳ දියඇල්ල

බදුල්ලේ සිට මහියංගනය පාරේ කි. මී. 4-5 පමණ ගියතැන දුන්හිඳ දියඇල්ලට යන පාර පටන් ගන්න තැන හමුවෙනවා. එතන ඉඳන් කි.මී 1ක් පමණ පාගමනින් ගිය තැන ඔබට දුන්හිඳ ඇල්ල දැකගැනීමට පුලුවන්. මේ මාර්ගය නම් තරමක් දුෂ්කරයි. ඒ දෙපස ඇති කඩවලින් ඔබේ පවස නිවාගැනීමට බෙලිමල් උගුරක් පානය කරන්න අමතක කරන්න එපා.
මීටර් 63ක් උසැති දුන්හිඳ, බදුලු ඔයේ විශාලතම දිය ඇල්ල මෙන්ම ලංකාවේ සුන්දරම දිය ඇල්ලක්ද වෙනවා. හෙට්ටිපොල කඳුවැටියේ සිට ගලාහැලෙන බදුලු ඔය, ඇල්ල කපොල්ල ස්ථානයේ දී මහවැලි ගඟට එකතුවෙනවා. ඌවේ චූඩා මාණික්‍යය ලෙස විරුදාවලි ලබා ඇති දුන්හිඳ දියඇල්ලට ශ්‍රීලංකාවේ දියඇලි අතර උසින් හිමිවන්නේ 33 වන ස්ථානයයි.

ඇඩිෂම් බංගලාව
බණ්ඩාරවෙල නගරයේ සිට කි. මී 12ක් පමණ කොළඹ දෙසට එනවිට හපුතලේ නගරය හමුවෙනවා. එතැනින් හැරී කි. මී 3-4 ක් පමණ ගියතැන පිහිටි මනස්කාන්ත පරිසරයකට මැදිව ඔබට මේ සුන්දර බංගලාව දැකගත හැකියි.
ඉංග්‍රීසි ජාතික ‍තෝමස් ලිස්ටර් විල්යස් විසින් 1931දී සාදවන ලද මෙය සම්පූර්ණ කලුගලෙන් කරවා වහලට බුරුම හා තේක්ක ලී අතුරා තිබෙනවා. මෙය වර්ථමානයේ හැඳින්වෙන්නේ ශාන්ත බෙනදික් තාපසාරාමය  ලෙසයි. මෙය නැරඹීමට ඔබට අවසර ඇත්තේ සති අන්ත දිනවල, පෝය දින සහ රජයේ නිවාඩු දිනවල පෙ.ව. 9.00 සිට ප.ව. 4.00 දක්වා පමණයි. මහසිකුරාදා සහ නත්තල් දිනයේදී මෙය නැරඹීමට අවසර නෑ.
අපි ගිය දිනයේ මෙය සම්පූර්ණයෙන්ම මීදුමෙන් වැසී පැවතුනා. ඉහත වම් ඡායාරූපයෙන් ඔබ දකින්නේ මීදුමට මැදිවූ ඇඩිෂම් බංගලාවයි. බංගලාවේ මිදුලේ සිට බැලූවිට අවට පරිසරය දිස්වන ආකාරය දකුණුපස ඡායාරූපයෙන් දැක්වෙනවා.

දියලුම දියඇල්ල

හපුතලේ නගරයේ සිට කි. මී. 6 ක් පමණ කොළඹ දෙසට  එනවිට බෙරගල හමුවෙනවා. බෙරගලින් හැරී වැල්ලවාය මාර්ගයේ තවත් කි. මී. 23ක් පමණ ගිය විට දියලුම ඇල්ල දැකගැනීමට පුලුවන්.

මීටර් 171ක් උස දියලුම ඇල්ල, පූනාගල ඔයෙන් පෝෂණය වෙන අතර ලංකාවේ දිය ඇලිවලින් උසින් තෙවන තැන හිමිවෙනවා. එමෙන්ම ලෝකයේ දිය ඇලි අතරින් 62වන ස්ථානය හිමිකර  ගන්නවා. පූනාගල ආශ්‍රිතව ඇති දිය ඇලි සමූහයෙන් අවසානම දිය ඇල්ල ලෙස සැලකෙන්නේ දියලුමයි. කුඩාඔය හා එක්ව ගලාබසිනා මෙය කිරිඳි ගඟට මුසුව තිස්සමහාරාමය ආසන්නයෙන් මුහුදට එක්වෙනවා. ජලජ පහන, දියගැලුම ඇල්ල, දිය හලුම ඇල්ල ලෙසද මෙය හැඳින්වෙන බව දැනගැනීමට ලැබුනා.
වඩාත්ම සොඳුරු දර්ශණ දැක ගැනීමට ලැබුනේ බෙරගල ඉඳන් දියලුමට එන මාර්ගයේ. එහිදී ඔබ නෙත ගැටෙන්නේ ඉතාමත් සුන්දර පරිසරයක්! වචනයෙන් විස්තර කරනවාට වඩා මෙම ඡායාරූප බැලීමෙන් එම සුන්දරත්වය ඔබට විඳගත හැකියි.

බඹරකන්ද දියඇල්ල

බෙරගල ඉඳන් කි. මී 10ක් පමණ කොළඹ දිශාවට යන ඔබට කලුපහන හන්දිය මුනගැසෙනවා. එතැනින් හැරී කි. මී. 5 ක් පමණ ගියතැන ඔබට මේ මනහර දිය ඇල්ල දැකගත හැකියි. අඩි 790ක් උසැති බඹරකන්ද දිය ඇල්ල ශ්‍රී ලංකාවේ උසම දියඇල්ල ලෙසත් ලෝකයේ දියඇලි අතර උසින් 48 වැන්න ලෙසත් සැලකෙනවා.





මේ ආදී සුන්දර තැන් ‍රැසක් නැරඹීමට අපිට මේ ගමනේදී හැකිවුනා. බණ්ඩාරවෙල චාරිකා කරන ඔබට නැරඹිය හැක්කේ මේ ලිපියේ සඳහන් ස්ථාන පමණක් නම් නෙවෙයි. ඔබ ගතකිරීමට බලාපොරොත්තු වන දින ගනන අනුව ඔබට බෝගොඩ පාලම, දෝව ගල් විහාරය, ලිප්ටන් සීට්, රාවනා ඇල්ල, දෙමෝදර පාලම, පූනගල ස්ටේට් ආදී සුන්දර තැන් ‍රැසක් දැකබලාගැනීමට හැකියි. නමුත් මේ සියලු තැන් බැලීමට වෙහෙසීමෙන් ගත විඩාවට පත් කරගන්නවාට වඩා සීතල කඳුකරයේ පහස විඳිමින් විවේක සුවය විඳීමටත් කාලයක් වෙන්කරගත යුතු බවයි මාගේ අදහස. ඔබත් ඉදිරියේදී මෙවැනි සංචාරයක් යෑමට බලාපොරොත්තුවේ නම්, මේ ලිපිය ප්‍රයෝජනවත් වේ යැයි සිතෙනවා. එහෙනම් ඔබට සුභ ගමන්!

read more "මීදුම මැදින් බණ්ඩාරවෙල යමුද?"

මම ගියා අවුකන බුදුන්ටත් දෑස් දුන් මිනිසා සොයා...

කාලෙකට පස්සෙ ලැබුනු නිවාඩුවේදි මට අනුරපුරේ සංචාරය කරන්න ලැබුනා. ඉතින් ඒ අත්දැකීමුත් එක්ක මම අද සූදානම් වෙන්නෙ, ......................
ඔබව වැව් බැඳි රාජධානියේ වන්දනා ගමනක් ‍රැගෙන යන්න! :)
ගොඩක් දෙනෙක් චාරිකාවක් ආරම්භ කරන්නෙ අදාල ස්ථානයට ගියාම. ඒ කියන්නෙ අනුරාධපුර චාරිකාවක් නම්, අනුරාධපුරේ නගරයට ගියාම. ඒත් මම හිතන්නේ අපි චාරිකාවක් රසවිඳින්න පටන් ගතයුත්තේ ගෙදරින් පිටත්වෙන විටමයි. අතරමගදී ඔබට ගොඩක් ලස්සන තැන් හමුවේවි. නැරඹිය හැකි ස්ථාන හමුවේවි. ඒවා නරඹමින් පරිසරය විඳිමින් ගමන්කරන්න.

කොළඹ ඉඳල අනුරාධපුරේට යන්න මාර්ග කීපයක්ම තියෙනවා. ඒ අතරින් අපේ අවශ්‍යතාවය අනුව ‍තෝරාගත් මාර්ග දෙකක විස්තර පහතින් දක්වන්නම්.
පුත්තලම හරහා
කි.මී. 210ක් පමණ වූ මේ මාර්ගය අදියර 4කින් විස්තර කරන්නම්.

• මුලින්ම A3 මාර්ගය ඔස්සේ කොළඹ සිට මීගමුවට (36KM) යා යුතුයි. මේ ගමනේදී පෑලියගොඩ, වත්තල, මාබෝල, වැලිසර, නාගොඩ, කඳාන, ජාඇල, බණ්ඩාරවත්ත, සීදූව, ක‍ටුනායක වැනි නගර ඔබට හමුවෙනවා.
• අනතුරුව එම මාර්ගයේම මීගමුවේ සිට හලාවත දක්වා 47KMක දුරක් ඔබ යායුතුයි. එහිදී කොච්චිකඩේ, වෙන්නප්පුව, මාරවිල වැනි නගර පසුවෙනවා.
• ඊලඟට එම මාර්ගයේම තවත් 54KM ක දුරක් පසුකර ඔබ පුත්තලමට සේන්දු වෙනවා.  එහිදී බංගදෙනිය, කිරියක්කල්ලි, මදුරන්කුලි, පලාවි යන ප්‍රදේශ පසුකරනවා.
• පුත්තලමේ සිට A12 මාර්ගයේ තවත් 75KM ක් ඇවෑමෙන් ඔබට අනුරාධපුරයට ලඟාවිය හැකියි. පෙරියවිල්ලු, මීඔය, කරුවලගස්වැව, දයියගම වැනි නගර ඔබට හමුවේවි.

දඹුල්ල හරහා
මෙම මාර්ගයත් දළවශයෙන් කි.මී. 210 ක් පමණ දුරයි. මෙම මාර්ගයත් පියවර 4කින් විස්තර කරන්නම්.

• පලමුව, කොළඹ සිට අඹේපුස්ස දක්වා කි.මී 58ක දුරක් A1 මාර්ගයේ යා යුතුයි. එහිදී, කිරිබත්ගොඩ, කඩවත, මිරිස්වත්ත, යක්කල, නිට්ටඹුව, පස්යාල, කජුගම, වේවැල්දෙනිය, දංඕවිට, වරකපොල වැනි නගර පසුවෙනවා.

[ඕනෑ නම් පස්යාල හන්දියෙන් හැරී මීරිගම, ගිරිඋල්ල, නාරම්මල, වාරියපොල, පාදෙනිය හරහාත් අනුරාධපුරයට යාහැකියි. එසේ යනවා නම්, කි. මී. 10-15ක පමණ දුරක් අඩුවේවි.]

• දෙවනුව අඹේපුස්ස සිට දඹුල්ල දක්වා කි.මී 90ක දුරක් A6 මාර්ගයේ ගමන් කල යුතුයි. එහිදී තුල්හිරිය, අලව්ව, වලකුඹුර, පොල්ගහවෙල, පොතුහැර, බෝයගනේ, වඳුරාගල, කුරුණෑගල, ඉබ්බාගමුව, ගොක‍රැල්ල, මැල්සිරිපුර, පන්ලියැද්ද, ඕමාරගොල්ල, බෙලිගමුව, ගලේවෙල, තලකිරියාගම යන ප්‍රදේශ ඔබට හමුවේවි.

[අවශ්‍යනම් කුරුණෑගලින් හැරී පාදෙනිය හරහාත් ඔබට අනුරාධපුරයට යාහැකියි. ඒ මාර්ගයේ යනව නම් කි.මී 6-7ක් ඉතුරුකරගන්න පුලුවන්. ]
හරි! දැන් ඔබට දඹුල්ල විහාරයත්, අවශ්‍ය නම්, ඊට කි.මී. 22ක් එහායින් වූ සීගිරියත් නැරඹීමට යන්න පුලුවන්.

• දඹුල්ලේ සිට A9 මාර්ගයේ කි. මී 52ක් දුරින් පිහිටියේ ගල්කුලම නගරය. (නමුත්, දඹුල්ලේ සිට ගල්කුලම දක්වා මාර්ගය අලුත්වැඩියා කටයුතු නිසා තරමක් දුෂ්කරයි. ඉතින්, ලඟදි අනුරාධපුරේ යන්න ඉන්න කෙනෙකුට නම් මේ මාර්ගය අනුමත කරන්න බෑ. අපි ඒ මාර්ගය ‍තෝරාගත්තේ දඹුල්ල හා සීගිරිය යාමේ අවශ්‍යතාවය තිබූ නිසයි.) මේ මාර්ගය අතරමගදී මද‍ටුගම, කැකිරාව, මරදන්කඩවල, තිරප්පනේ යන නගර හමුවෙනවා. ඒඅතරතුරදී ඔබට ජාතික නාමල් උයන හෝ අව්කන පිලිමය නැරඹීමට යා හැකියි.
• ගල්කුලමේ සිට තවත් කි.මී. 12ක් A13 මාර්ගයේ ගමන් කිරීමෙන් ඔබට අනුරාධපුරයට පිවිසිය හැකියි.

දැන් අප සිටින්නේ අපේ ගමනාන්තයේ. ඒ කියන්නේ, අනුරාධපුර නගරයේ. මුහුදුමට්ටමේ සිට අඩි 295ක් උසින් පිහිටි අනුරාධපුරය මෙරට වැඩිම කාලයක්, වැඩිම රජවරු පිරිසක් විසින් පාලනය කල රාජධානියයි.

ක්‍රි.පූ. 437 සිට ක්‍රි.ව. 1029 දක්වා කාලය තුල පණ්ඩුකාභය රජුගේ සිට Vවන මිහිඳු දක්වා රජවරුන් සියයකට අධික ප්‍රමාණයක් අනුරාධපුරය සිය රාජධානිය කරගෙන සිටියා. 

අනුරාධපුර සංචාරය කරන බෞද්ධයින්ගේ ප්‍රධාන අරමුණක් වන්නේ අටමස්ථාන වන්දනා කිරීම. දුරාතීතයේ පටන් අටමස්ථාන ලෙස හඳුන්වාඇත්තේ තිස්සාරාමය, කම්මාලකය, ඡන්තාඝර පොකුණ, ශ්‍රීමහා බෝධිය, ලෝවාමහාපාය, ලභබත්ගෙය, දාන ශාලාව සහ රුවන්වැලි මහා සෑයයි.
කාලිංඝ මාඝ ආක්‍රමණයෙන් නටඹුන් වූ අනුරාධපුර නගරය සෑහෙන කාලයක් වල් වැදී පැවතුනා. එසේ තිබියදී ක්‍රි.ව. 1856 දී ඉංග්‍රීසි රජය විසින් අටමස්ථානය යලි නාමකරණය කරනවා.

ඉහත සිතියම විශාල කර බලන්න. එහි නිල් පාට සලකුණුවලින් දක්වා ඇත්තේ එසේ නම්කෙරුණු අටමස්ථානයි. රෝස පැහැ සලකුණුවලින් දක්වා ඇත්තේ ඒ අවට ඇති සෙසු පෞරාණික සිද්ධස්ථාන කීපයක්.

යමු මාත් එක්ක.. ඒ ප්‍රෞඩ අතීතයට යලිත් එබිකම් කරන්නට!

මේ තියෙන්නෙ ශ්‍රී මහා බෝධිය

ශ්‍රී මහා බෝධිය ගැන යමක් කියනවානම්, ක්‍රි. පූ. 3 වන සියවසේදී සංඝමිත්තා තෙරණිය විසින් මෙය ලංකාවට වැඩම කරවූවා. ජය ශ්‍රීමහා බෝධිය වැඳ පුදාගැනීමෙන් ඔබට අටමස්ථාන වන්දනාව ආරම්භ කල හැකියි.

ශ්‍රී මහා බෝධියට පි‍ටුපසින් තියෙන්නෙ, ලෝවාමහාපාය. මෙහි ගල්කණු 1600ක් දැකගත හැකියි. IIවන පෑතිස් රජු විසින් කරවන ලද මෙය දු‍ටුගැමුණු රජතුමා විසින් නවමහල් කොට නවීකරණය කරවූවා. මෙහි යට මහලේ පෘතග්ජන භික්ෂූනුත්, දෙවැන්නේ සිට නව වැනි මහල දක්වා රහතන් වහන්සේලාත් වැඩසිටි බව සඳහන් වෙනවා. පසුකාලීනව බොහෝ රජවරුන් මෙය ප්‍රතිසංස්කරණය කල බව කියැවෙනවා. ලෝවාමහාපායේ මැද ඇති ගොඩනැගිල්ල නම් මෑතකාලයේ සාදන ලද්දක්.

මහාවිහාර භූමියට අයත් ගොඩනැගිලි ත්‍රිත්වයෙන් දෙකක් අපි දැන් වැඳපුදාගත්තා. ඊට අයත් ඉතිරි ගොඩනැගිල්ල රුවන්වැලිසෑයයි. වම්පසින් තියෙන්නේ මගේ කැමරා කාචයේ සටහන් වූ රුවන්වැලිසෑය. දකුණුපසින් තියෙන්නේ සොලීන් විසින් විනාශ කරන ලද රුවන්වැලිසෑයේ පෞරාණික ඡායාරූපයක්!.

බුබ්බුලාකාර හැඩයෙන් යුතු මෙය සාදවන ලද්දේ දු‍ටුගැමුණු රජු විසින්. මෙය සාදවා නිමකරවන ලද්දේ සද්ධාතිස්ස රජතුමා විසින්. අඩි 300ක් පමණ උස වූ මෙහි සර්වඥධාතුන් වහන්සේලා ද්‍රෝණයක් පමණ නිධන් කොට ඇති බව සඳහන් වෙනවා.

ඊලඟට අපි වැඳපුදාගත්තේ මිරිසවැටිය චෛත්‍යය. අඩි 60ක් උස මිරිසවැටිය චෛත්‍යය ක්‍රි.පූ. 161 - 137 අතර කාලයේදී සාදවන ලද්දක්. භික්ෂූන්ට නොදී මිරිස් මාලුවක් කෑමෙන් ඇති වූ පශ්චාත්තාපය නිසා දු‍ටුගැමුණු රජතුමා විසින් මෙය කරවන ලද බව සඳහන් වෙනවා. පහත වම් පැත්තෙ ඡායාරූපයේ තියෙන්නෙ මිරිසවැටිය චෛත්‍යය.
දැන් අපි යමු ථූපාරාමයට. ඉහල දකුණු පැත්තෙ ඡායාරූපයේ තියෙන්නෙ ථූපාරාම චෛත්‍යය. ථූපාරාමය කියන්නෙ මහින්දාගමනයෙන් පසු ලංකාවේ ඉදිවූ පළමු චෛත්‍යය. IIවන පෑතිස් රජතුමා විසින් මෙය ඉදිකර තිබෙනවා. මුලින් ධාන්‍යාකාර වුවත් දැන් ඝාන්ටාකාර හැඩයක් ගන්නා ථූපාරාම දාගැබේ උස අඩි 63ක්. මෙහි බුදුරජාණන්වහන්සේගේ දකුණු අකු ධාතුව නිදන් කොට තිබෙනවා. එවකට දාගැබ වටා වටදාගෙයකුත් තිබිල තියෙනවා. අදටත් ඉන් ශේෂ වූ ගල් කණු දාගැබ වටා පිහිටා ඇති ආකාරය ඔබට දැක ගැනීමට පුලුවන්.

මේ තියෙන්නේ අභයගිරිය ස්තූපය. මේකෙ ප්‍රතිසංස්කරණ කටයුතු තවමත් සිදුකරමින් පවතිනවා. අඩි 245ක් උස අභයගිරිය ස්තූපය සාදවන ලද්දේ වලගම්බා රජතුමා විසින්. ක්‍රි. පූ 89-77 අතර කාලයේදී ඉදිකල මෙහි ඉතිහාසය විමසා බැලීම වටිනවා. වලගම්බා රජු පලා යද්දී ගිරි නම් නිඝන්ටයෙකු "මහා කලු සිංහලයා පළා යනෝ.." යැයි කෑ ගැසූ කථාව ඔබ දන්නවා ඇති. මෙම ස්තූපය සාදවා ඇත්තේ එදා ඒ සිදුවීම වූ භූමියේ.

අභයගිරිය වැඳපුදාගත් අපේ ඊලඟ ගමනාන්තය උනේ ලංකාරාමය. මෙයත් වලගම්බා රජතුමා විසින් කරවු බව සඳහන් වෙනවා. අඩි 38ක විශ්කම්භයක් සහිත මෙය සෝමාදේවිය සිහිවීම පිනිස ඉදිකරන ලද්දක් යැයි සැලකෙන බැවින් 'සෝමාරාමය' ලෙසද හඳුන්වනු ලබනවා.

ඊලඟට අපි නතර උනේ ජේතවන ස්තූපය අසල. මෙය ක්‍රි.ව. 273-301 අතර කාලයේදී මහසෙන් රජු විසින් සාදවන ලද්දක්. ඒ කාලයේ මෙය අඩි 400ක් පමණ උස උනත්, දැන් උස අඩි 232ක් පමණ වෙනවා. මෙහි බුදුරජාණන්වහන්සේගේ පටී ධාතුව තැන්පත් කර ඇතිබව සඳහන්වෙනවා.






හරි! දැන් අපේ ප්‍රධාන අරමුණ සම්පූර්ණයි. හැබැයි, අනුරාධපුරයේ ඔබට දැක බලාගන්න තියෙන්නේ අටමස්ථාන විතරක් නම් නෙමෙයි. අටමස්ථාන අවට පුරාවස්තු නම් බොහොමයි. මේක පූජා නගරයක් මෙන්ම කෞතුක නගරයක් ලෙසද හැඳින්වෙන්නෙ ඒකයි.
පහත වම් පසින් දැක්වෙන්නේ මගේ කැමරාව  තුල සටහන් වූ සමාධි පිළිමය. දකුණු පසින් දැක්වෙන්නේ එහි ඉතා පැරණි ඡායාරූපයක්.

මේ මොකක්ද කියලත් ඔබට අමුතුවෙන් කිවයුතු නෑ. ඔව්, ඔබ හරි. මේ තියෙන්නේ කූට්ටම් පොකුණ.

අනුරාධපුරය වන්දනා කරන අය යා යුතුම තැනක් තමයි ඉසුරුමුණිය. මනරම් බිම්කඩක පිහිටා ඇති මෙහි පි‍ටුපසින් තිසාවැව දැකගැනීමට පුලුවන්. මෙහිදී මිනිසා සහ අශ්ව හිස කැටයමත්, දිය කෙලින ඇතුන් කැටයමත් දැකබලාගන්නා ඔබ, ඉසුරුමුණි කෞතුකාගාරයේදී දු‍ටුගැමුණු රජ පවුලත්, ඉසුරුමුණි පෙම්යුවලත් දැකබලාගන්නවා.

මේ ඡායාරූපයේ දැක්වෙන්නේ ඉසුරුමුණි විහාරය.



ඉසුරුමුනියේ නුඹ මැවූ....  පෙම්බරිය කොතනද කියා.....
මා ඇසූ විට හිනැහුනා ඔහු...  තවම තනිකඩයැයි කියා....


අවසාන වශයෙන් අපි ගියේ මිහින්තලය වැඳපුදා ගන්න. අනුරාධපුර නගරයේ සිට කි. මී 17ක්  පමණ දුරින් පිහිටි මිහින්තල පුදබිමේදී ආරාධනා ගල, මිහිඳු ගුහාව, මිහිඳු සෑය, සේල චෛත්‍යය, සිංහ පොකුණ, සන්නිපාත ශාලාව, මිහිඳු පුවරු ලිපි ඇතුලු තවත් බොහෝ දෑ දැකබලා ගැනීමට හැකියාව ලැබුනා. ඉහල දකුණු පැත්තේ ඡායාරූපයේ තියෙන්නේ මිහින්තලා පුදබිමේදී ලබාගත් ඡායාරූපයක්.

මේ ආදී සිද්ධස්ථාන රාශියක් වැඳපුදාගෙන අපි ආපහු නිවෙස් වලට පිටත් වුනා. ඉදිරියේදී අනුරාධපුරයේ චාරිකා කරන්න ඉන්න අයට මේ ලිපිය ගොඩක් ප්‍රයෝජනවත් වේවි. ඔබටත් එහෙම හිතෙනවනම්, මගේ සතුටත් එයයි.

සැ. යු. සිතියම් ඡායාරූප google map වෙතින් ලබාගන්නා ලදී.  පැරණි ඡායාරූප ඉමේජස් ඔෆ් සිලෝන් වෙබ් අඩවියෙන් උපුටාගන්නා ලදී. අනිකුත් සියලු ඡායාරූපවල අයිතිය මා සතුයි.

read more "මම ගියා අවුකන බුදුන්ටත් දෑස් දුන් මිනිසා සොයා..."

ටේලර් සාප්පුව ගිනිගනී

අද මම ඔබව ගෙනියනවා අවුරුදු 16 ක් අතීතයට. හරියටම දිනය කියනවනම්, 1996 මාර්තු 18 වැනි සඳුදා. ලංකාව ලෝක ක්‍රිකට් කුසලානය දිනාගත්තු දවසට පසු දිනය. එදා දිවයින පත්තරේ සිරස්තලය තමයි මේ.

අර්ජුන රණතුංග පකිස්තානු අගමැති බෙනාසීර් බූ‍තෝ අතින් ලෝක කුසලානය ලබාගන්නා අයුරු දැක්වෙන අපැහැදිලි ඡායාරූපයක් ඊට වම් පසින් මුද්‍රණය කර තිබුනා.

සිරස්තලයට යටින් තිබුනේ ලංකා නායක අර්ජුන සහ උපනායක අරවින්දගේ ඡායාරූප දෙකක්.

මුල්පි‍ටුවට අමතරව ක්‍රීඩාපි‍ටුව සම්පූර්ණයෙන්ම වාගේ වෙන්ව තිබුනේ අවසාන තරඟයේ තතු විත්ති ගෙන ඒමට.

"ලෝක ක්‍රිකට් ශූරතාව ශ්‍රී ලංකාවට"
"ටේලර්ගේ මැහුම් වරදියි"
ක්‍රීඩාපි‍ටුවෙන් ඕස්ට්‍රේලියානු නායකයාව උපහාසයට ලක් කර තිබුනේ එහෙමයි.

"ජගත් ක්‍රිකට් ඉතිහාසයේ අමරණීය මතක සටහනක් සනි‍ටුහන් කල අර්ජුන රණතුංග ප්‍රමුඛ ශ්‍රී ලංකා ක්‍රිකට් ක්‍රීඩකයෝ, ඊයේ (17 දා) පකිස්තානයේ ලාහෝර්හිදී ඕස්ට්‍රේලියාව කඩුලු හතකින් පරදවා විල්ස් කුසලාන ලෝක ක්‍රිකට් ශූරතාව දිනා ගත් බව දිවයින සාඩම්බරයෙන් වාර්තා කරයි.
ජගත් ක්‍රිකට් ශූරතාව ආසියානු කලාපයේ ක්‍රිකට් කණ්ඩායමක් විසින් දිනාගත් තුන්වන අවස්ථාව මෙය වන අතර මීට පෙර ඉන්දියාව සහ පකිස්තානය පිළිවෙළින් අදාල ශූරතාව දිනා ගැනීමට සමත් වී ඇත.

ලංකාව සහ ඕස්ට්‍රේලියාව අතර ඊයේ ලාහෝර්හි දී පැවැති විල්ස් කුසලාන ලෝක ශූරතා අවසන් තරගයේ දී පළමුව ඉනිම ඇ‍රැඹූ ඕස්ට්‍රේලියා කණ්ඩායම පන්දු වාර 50 ක් අවසානයේ කඩුලු 7ක් දැවී ලකුණු 241 ක් ‍රැස් කළ අතර පිළිතුරු වශයෙන් ශ්‍රී ලංකා කණ්ඩායම පන්දුවාර 46.2 කදී කඩුලු 3 කට ලකුණු 245ක් ‍රැස් කොට සිය ඓතිහාසික ජයග්‍රහණය වාර්තා කිරීමට සමත් විය.
ඊයේ ශ්‍රී ලංකාව වෙනුවෙන් සාර්ථක ඉනිමක් ගොඩනැගූ උපනායක අරවින්ද ද සිල්වා (ලකුණු 107-නොදැවී) තරගයේ වීරයා ලෙස සම්මාන ලැබුවේය.
ශ්‍රී ලංකා කණ්ඩායම ඊයේ ලැබූ මෙම අනභිබවනීය ජයග්‍රහණයෙන් උද්දාමයට පත් වූ ශ්‍රී ලාංකික ජනතාව ප්‍රීති ඝෝෂා නගමින් සාමකාමීව වීදි සංචාරයේ යෙදුනු දක්නට ලැබිණි."

එම විස්තරයට දකුණුපසින් සනත් ජයසූරිය තරගාවලියේ වීරයා සම්මානය ලබාගන්නා ඡායාරූපයත්, අරවින්ද විසින් තරගයේ වීරයා සම්මානය ලබාගන්නා ඡායාරූපයත් දක්වා තිබුනා.

එදා තරගයේ ලකුණු පුවරුව මෙතනින් බලන්න.

එදා එම පුවත්පතේ තිබුනු ක්‍රිකට් වලට සම්බන්ධ නැති දැන්වීමකුත් මගේ අවධානය දිනාගත්තා. ඔබට මතකද "ඉටිපහන්" ටෙලිනාට්‍යය?
එදිනට පසු සතියේ ඉඳන් විකාශය වීමට නියමිතව තිබූ ඉටිපහන් ටෙලිනාට්‍ය දැන්වීමේ රූපරාමුවල ඉන්න කුඩා දැරිය ඔබ අඳුරනවාද? (විශාල කර බලන්න)
ඇය තමයි අද දවසේ ප්‍රසිද්ධ නිලියක් වූ අනර්කලී ආකර්ශා. නලු නිලි ලයිස්තුවේ ඇගේ නම සඳහන්වෙලා තියෙන්නේ "අනර්කලී ජයතිලක" ලෙස.



මේ වගේ තවත් වැදගත් පුවත්පත් කීපයක් මා සතුව තියෙනවා. ඉඩ ලැබෙන විදියට ඉදිරියේදී ඒවා පලකරන්නම්.
වසර 82 ක් පැරණි මුල්ම සිළුමිණ පුවත්පත ගැන මම ලියපු ලිපිය මෙතනින් බලන්න.

read more "ටේලර් සාප්පුව ගිනිගනී"

අවවාදයයි! ඔබත් ෆෝබියාවෙන් පෙලෙන්නෙක් විය හැක.

ෆෝබියාව කියල කියන්නෙ යමකට තියෙන අධික සහ අසාමාන්‍ය බයට. ඒවගේම ෆෝබියාව කියන්නේ මානසික රෝග විශේෂයක්.
ෆෝබියාව සාමාන්‍ය භීතියෙන් වෙනස් වන්නේ කෙසේද?
එන්නතක් විදින්න කලින් එන්නත් ක‍ටුවක් දැක්කම බය හිතෙන එක සාමාන්‍යයි. නමුත්, ඒ හේතුවෙන් අතවශ්‍ය වෛද්‍යප්‍රතිකාර වලින් ඉවත්වී සිටී නම්, ඔබට ඇත්තේ ෆෝබියාවක් විය හැකියි.
යමෙකුට ෆෝබියාව වැලඳීමට නිශ්චිත හා ස්ථිර හේතුවක් කියන්න බැහැ. නමුත් ෆෝබියාවට හේතුකාරක වියහැකි දේවල් කීපයක් මෙසේ දක්වන්න පුලුවන්.

• පාරම්පරික ෆෝබියා තත්වයන්.
• තමන් ලැබූ බියජනක අත්දැකීමක් නිසා.
• තමන් දු‍ටු බියජනක අත්දැකීමක් නිසා.
• ෆෝබියාවෙන් පෙලෙන්නෙකු ඊට හේතුවන අත්දැකීමක් ලබද්දී ඒ සමීපයෙහි සිටීම.
• බියජනක අවස්ථාවක් ගැන දැනගැනීමට ලැබීම.

ෆෝබියාව පහත ආකාරයට වර්ග කීපයකට බෙදා දක්වන්න පුලුවන්.

1. Natural environment phobia - ස්වාභාවික සංසිද්ධීන්ට දක්වන අධික බිය
2. Animal phobia - සත්ව වර්ග වලට දක්වන අධික බිය
3. Blood-injection-injury phobia - රුධිරය/එන්නත් වැනි දෑට ඇති අධික බිය
4. Situational phobia - ඇතැම් ස්ථාන හා අවස්ථා වලට ඇති අධික බිය

ඉහත මුල් අවස්ථා තුන බොහෝවිට ආරම්භ වන්නේ කුඩාකාලයේදී. Situational phobia යන්න බොහෝවිට වැඩිහිටි වයසේදී ආරම්භ වෙනවා. ඒවගේම කාන්තාවන් පිරිමින්ට වඩා ෆෝබියා තත්වයට පත්වීමේ හැකියාව වැඩි බවයි පර්යේෂකයන් සඳහන් කරන්නේ.

මේ වන විට හඳුනාගෙන ඇති ෆෝබියා වර්ග ගනන 500 කට අධිකයි. පහත දැක්වෙන්නේ එයින් මම ‍තෝරාගත් කිහිපයක ලයිස්තුවක්. කියවා බලන්න. සමහරවිට ඔබත් ෆෝබියාවෙන් පෙලෙන්නෙක් විය හැකියි.

	අබ්ලුට්‍රොෆෝබියා (Ablutophobia) - දිය නෑමට ඇති බිය
	අකරොෆෝබියා (Acarophobia) - කැසීමට ඇති බිය
	ඒසරොෆෝබියා (Acerophobia) - පැඟිරි රසයට ඇති බිය
	අවුලුඕෆෝබියා (Achluophobia)- අඳුරට ඇති බිය
	අකවුස්ටික්ෆෝබියා (Acousticophobia) - ශබ්දයට ඇති බිය
	ඇක්‍රොෆෝබියා (Acrophobia) - උස ස්ථාන වලට ඇති බිය
	එයරොෆෝබියා (Aerophobia) - ගුවන් යානාවල යාමට ඇති බිය
	ඇග්ලිඔෆෝබියා (Agliophobia) - සුලු වේදනාවක්පවා විඳීමට ඇති බිය
	ඇග්‍රිසූෆෝබියා (Agrizoophobia) - වන සතුන්ට ඇති බිය
	එකොමොෆෝබියා (Aichmophobia) - උල් සහිත උපකරණ වලට ඇති බිය
	ඇමතොෆෝබියා (Amathophobia) - දූවිල්ලට ඇති බිය
	ඇල්බමයිනුරෝෆෝබියා (Albuminurophobia) - වකුගඩු රෝගයක් සෑදෙතැයි ඇති බිය
	කොයිමෙට්‍රොෆෝබියා (Coimetrophobia) - සුසානභූමි වලට ඇති බිය
	ඩිසිඩොෆෝබියා (Decidophobia) - තීරණ ගැනීමට ඇති බිය
	ඉලෙක්ට්‍රොෆෝබියා (Electrophobia) - විදුලිබලයට ඇති බිය
	එන්ටොමොෆෝබියා (Entomophobia) - කෘමින්ට ඇති බිය
	එපිස්ටැක්සියොෆෝබියා (Epistaxiophobia) - නාසයෙන් ලේ ගලනු ඇතැයි බිය වීම
	ගැමොෆෝබියා (Gamophobia) - විවාහවීමට ඇති බිය
	ගෙ‍රැස්කොෆෝබියා (Gerascophobia) - වයසට යාමට ඇති බිය
	හෙලියොෆෝබියා (Heliophobia) - හිරු එලියට ඇති බිය
	හර්පෙටොෆෝබියා (Herpetophobia) - උරගයින්ට ඇති බිය
	හිමොෆෝබියා (Hemophobia) - රුධිරයට ඇති බිය
	හොප්ලොෆෝබියා (Hoplophobia) - ගිනි අවි වලට ඇති බිය
	හයිඩ්‍රොෆෝබියා (Hydrophobia) - වතුරට ඇති බිය
	ඉයට්‍රොෆෝබියා (Iatrophobia) - වෛද්‍යවරුන්ට ඇති බිය
	ඇ‍රැක්නොෆෝබියා (Arachnophobia) - මකුලුවන්ට ඇති බිය
	ඇටැක්සොෆෝබියා (Ataxophobia) - අපිරිසිදු තැන්වලට යාමට ඇති බිය
	ඔටෝමැට්නො ෆෝබියා (Automatonophobia) - ඉටිරූප, පිළිම ආදියට ඇති බිය.
	බැසිලොෆෝබියා (Bacillophobia) - විෂබීජ වලට ඇති බිය
	බාතොෆෝබියා (Bathophobia) - ගැඹුරු ස්ථාන වලට ඇති බිය
	බුෆොනොෆෝබියා (Bufonophobia) - ගෙම්බන්ට ඇති බිය
	කාසිනෝෆෝබියා (Carcinophobia) - පිළිකාවක් වැල‍ඳෙතැයි ඇති බිය.
	සෙරව්නොෆෝබියා (Ceraunophobia) - අහසේ ගෙරවිලි ශබ්දවලට ඇති බිය
	ක්‍රොමොෆෝබියා (Chromophobia) - වර්ණ වලට ඇති බිය
	ක්ලයිමකොෆෝබියා (Climacophobia) - පඩිපෙලවලට ඇති බිය
	මෙලොෆෝබියා (Melophobia) - සංගීතයට ඇති බිය
	මෙතිෆෝබියා (Methyphobia) - මත්පැන්වලට ඇති බිය
	නෙක්‍රොෆෝබියා (Necrophobia) - මරණයට ඇති අධික බිය
	නොසොකොමෙෆෝබියා (Nosocomephobia) - ආරෝග්‍යශාලා වලට ඇති අධික බිය
	පැන්තොෆෝබියා (Panthophobia) - රෝග වලට ඇති අධික බිය
	පොගොනොෆෝබියා (Pogonophobia) - ‍රැවුලට ඇති බිය
	ෆයිරොෆෝබියා (Pyrophobia) - ගින්දරට ඇති බිය
	සියොෆෝබියා (Sciophobia) - සෙවනැලි වලට ඇති බිය
	ටැකොෆෝබියා (Tachophobia) - වේගයට ඇති බිය
	තාලාසොෆෝබියා (Thalassophobia) - මුහුදට ඇති බිය
	ට්‍රිස්කයිඩෙකාෆෝබියා (Triskaidekaphobia) - අංක 13ට ඇති බිය
	සියුසොෆෝබියා (Zeusophobia) - දෙවිවරුන්ට ඇති බිය

මූලාශ්‍ර : මුතුහර සඟරාව, අන්තර්ජාලය, සතිඅන්ත පුවත්පත්
            මෙහි එන සියලු ඡායාරූප අන්තර්ජාලයෙන් ලබාගන්නා ලදී.

read more "අවවාදයයි! ඔබත් ෆෝබියාවෙන් පෙලෙන්නෙක් විය හැක."